الكبير كبير مسؤليه

الكبير كبير مسؤليه

كتبت/وفاء المصري

على فكرة كُبر السن مش دليل على الاحترام، ولا العقل، ولا التدين، ولا الرزانة.. إيه الميزة اللي ممكن تكون عندك في إنك اتولدت قبلي لو ده مش مقترن باحترام لنفسك ولسنك ولغيرك!.. ما هو عادي جداً فيه شخص كبير ومتحرش، وشخص كبير وحرامي، وشخص كبير مايعرفش ربنا رغم إن مفيش على لسانه إلا سيرته!..

أعرف ناس بالمعايير العمرية لسه في بداية طريقهم ورغم كده مخهم يوزن بلد.. وأعرف ناس تانية سنهم كبير بس مخهم خفيف، وأخلاقهم أخف..

“الكبير” في بيته هو اللي بيشيل مسؤولية.. “الكبير” في العلاقة هو اللي بيكبر دماغه وبيتغاضى عن التفاهات عشان الأمور تكمل.. “الكبير” في الشغل هو اللي بيكبر اللي حواليه.. “الكبير” في الصداقة هو اللي تلاقيه وقت ما تحتاجه.. “الكبير” في العيلة هو اللي بيجيب الحقوق مش بياكلها، وهو اللي بيتلم ويحاوط مش يبعتر ويفرق..

الناس عايزة تبقى كبيرة بالإسم والسن بدون فعل!.. الأفعال هي اللي بتكّبر أو بتصّغر صاحبها وبيها يا بتتشاف كبير بجد حتى لو كنت لسه بتحبي أو مهزأ حتى لو الشعر الأبيض زحف على راسك.